شلون نسوي حملة اعلانية على ميتا؟

حتى تسوي حملة اعلانية اول شي لازم تفتح مدير الاعلانات عن طريق كتابة مدير الإعلانات على كوكل في اي متصفح وبعدها تسجل دخول بحساب صفحتك

وهنا نأكد على اهمية انشاء الحملة الاعلانية من مدير الاعلانات ونبتعد عن الترويج مباشرة من الانستكرام او الفيسبوك لأن هواية تفاصيل وخصائص ما راح تكون موجودة اذا روجنا عن طريق الانستكرام او الفيسبوك وننصح تفتح مدير الاعلانات عن طريق الحاسبة لأن ايضًا يختلف عن نسخة التلفون واسهل وبيه خصائص ما موجودة أو غير واضحة، على التلفون.

واذا كان ماعندك حاسبة تكدر تفتح مدير الإعلانات نسخة الحاسبة على التلفون وهذا الفيديو يشرح شلون تفتح مدير الإعلانات نسخة الحاسبة من تلفونك.

بعد ما سجلنا حسابنا بمدير الإعلانات راح تظهر الواجهة الرئيسية لمدير الاعلانات اضغط على واجهة الحملات الاعلانية اللي من خلالها راح تسوي الحملة الإعلانية ثم اضغط كلمة انشاء اللي باللون الاخضر

راح يطلب من عدنا نختار هدف الحملة الاعلانية وراح نشوف عدة أهداف اللي هي:

الوعي: وهذا يفيدنا اذا نريد نوعي العالم بالمتجر مالتنا ونريد الناس يعرفون اسم صفحتنا او خدماتنا
الزيارات: إذا كان عدنا موقع الكتروني ونريد الناس يدخلون عليه بصورة أكبر يعني نزيد زيارات الموقع
التفاعل: وهذا اذا نريد نزيد التفاعل على الصفحة او منشور المنتج مالتنا سواء تعليقات او لايكات والاهم الرسائل
العملاء المحتملون: هذا الهدف ينفعنا في حال ردنا نجمع معلومات الزبائن بعدها احنا نتواصل وية الزبائن
ترويج التطبيق: وهذا في حال عندنا تطبيق نريد نزيد عدد تحميلاته عن طريق ترويجه على مواقع التواصل الاجتماعي
المبيعات: وهذا الهدف مشابه للتفاعل بس نكدر نربط بي ادوات ثانية تساعدنا في تنزيل معلومات الزبائن وغيرها ونكدر نعيد استهدافهم

اللي يهمنا هو هدف التفاعل اللي دائمًا نركز عليه حتى نحصل اكبر قدر من الرسائل وبعد مانختار هدف التفاعل راح تظهر النا واجهة يطلب من عندنا الاختيار اما جذب رسائل مخصصة او حملة إعلانية يدوية

شنو الفرق بين الاثنين؟

الاولى تكون اوتوماتيكية مبسطة واغلب الاختيارات هي راح تكون افتراضية مثلا المواضع والجمهور وغيرها وهذا الخيار نكدر نختاره اذا كانت خبرتنا كلش قليلة وما ننصح بيه

الثاني حيكون يكون بيه خيارات اكثر وكل التفاصيل راح نكدر نتحكم بيها وراح يكون أكثر تعقيد بس بيه تفاصيل أكثر وننصح بيه اكيد، ورة ما نختاره ونضغط متابعة راح تظهر واجهة واللي تحتوي على 3 أشياء رئيسية اللي هي:

الحملة الإعلانية: وهنا بس نسمي الحملة الاعلانية حتى تساعدنا بعدين بالبحث وهنا ما نحتاج نغير شي لان احنا حددنا هدف الحملة الاعلانية اللي هو التفاعل

واكو خيار ميزانية الحملة الإعلانية Advantage+ وهذا إذا كان عندنا اكثر من مجموعة اعلانية ونريد نوزع الميزانية عليهم ونكدر نبحث ونقرأ أكثر عن هذا الخيار بس احنا ما راح نستخدمه بالحملة الاعتيادية وايضًا اكو خيار اختبار A/B اللي يساعدنا نجرب بين أكثر من جمهور واستهداف والخ وهذا ايضًا ما راح نستخدمه بالحملة الاعتيادية

المجموعة الإعلانية: وهنا اكو مجموعة خطوات لازم ننتبه الها:

اول شي نشوفه هو التحويل وهنا المقصود وين نريد التفاعل يتحول، هل الى:

تطبيقات المراسلة: وهنا المقصود الماسنجر او واتساب واكيد رسائل على الانستكرام
بالاعلان: هنا تكون اعلاناتنا تصعد من حيث اللايكات او التعليقات يعني التفاعل بصورة عامة على الاعلان
اتصالات: اذا نريد الزبائن يتصلون علينا مباشرة من خلال اعلاننا
موقع ويب: وهنا نخلي التفاعل يكون على موقعنا الإلكتروني
تطبيق: ايضًا اذا نريد نخلي التفاعل على التطبيق
صفحة فيسبوك: وهنا نكدر اكيد نحول التفاعل على صفحتنا بالفيسبوك

اللي نركز عليه هنا هو تطبيقات المراسلة لان هدفنا هو نحصل أكبر عدد من الرسائل حتى يكتبولنا عنوانهم ورقم التلفون وبالنهاية نثبت الطلب

بعدها نحدد الصفحة الخاصة بينا ونختار التطبيقات اللي نريدها للتواصل والرسائل واذا كنا رابطين رقم واتساب أعمال راح نكدر نسجل

وراها راح نشوف مجموعة خيارات ماراح نغيرها مثل هدف الأداء وراح يكون زيادة عدد المحادثات إلى أقصى حد
والتحكم في عرض الأسعار.

بعدها ننتقل الى الميزانية والجدول الزمني

وهنا اكو نوعين من الميزانية: الاول هو الميزانية اليومية اللي احنا هنا نحددلها مبلغ ثابت كل يوم تصرفه على الاعلان
او نخلي ميزانية الحملة كلها وهنا راح تتحدد ميزانية للفترة كلها فاذا حددنا المدة اسبوع فالمبلغ الي راح نحدده يتقسم على هذا الاسبوع

ثنينهم نكدر نستخدمهم بس اللي ننصح بيه هو حملة الميزانية كلها لان هنا ما راح يصرف مبلغ ثابت باليوم مثل الميزانية اليومية لكن راح يشوف الأوقات اللي يزداد بيها التفاعل على حملتنا ويزيد مبلغ الصرف
واكيد نحدد موعد بدء ونهاية للحملة وبما انه هذه حملة ممكن تكون تجريبية فننصح نخلي الحملة اقل شي 3 ايام ونخلي الميزانية من 10 الى 5 دولار وكلما كانت الميزانية أكبر ومدة الحملة اكبر راح تكون نتائج الاختبار أصح

بعدها راح نشوف خيار جمهور Advantage+ اللي نكدر نكول علية استهداف تلقائي

Advantage+ هو خيار استهداف يسمح لشركة Meta باستخدام الذكاء الاصطناعي لتحديد الجمهور اللي راح يشوف إعلاناتنا. تعتمد أنظمة Meta على التعلم المستمر من بياناتنا وتاريخ التحويلات، والأشخاص الذين تفاعلوا مع إعلاناتنا

ونكدر نغيره عن طريق الضغط على تبديل الى خيارات الجمهور الاصلي وهنا نكدر نختار تفاصيل الجمهور مثل العمر والاهتمامات وايضاً نكدر نستهدف محافظات معينة او نلغي بعض المحافظات من خلال خيار استبعاد ونكتب اسم المحافظة بس بما انه احنا جديدين نخلي الاستهداف اوتوماتيك ونخلي خوارزمية الاعلانات هي اللي تحدد الجمهور

وبعدين ورة ماتصير عندنا خبرة اكبر و طلبات اكبر راح نكدر نشوف طلباتنا من اي محافظة تجي ونكدر نشوف كل إحصائيات الطلبات بتطبيق فدشي ونستفاد منها حتى يكون استهدافنا كل مرة ادق واحسن بس بالبداية نخلي كلشي عام.

آخر خطوة بالمجموعة الإعلانية هي نختار المواضع والمقصود هنا نحدد وين الاماكن اللي راح يظهر بيها اعلانا على مواقع التواصل الاجتماعي وايضاً راح يكون على الوضع الأوتوماتيكي واللي يسمى ADVANTAGE +

وهنا ممكن نسوي تعديلات بسيطة، راح نحول الى المواضع اليدوية ونشيل الماسنجر و Audience Network

لان على الماسنجر راح يظهر الاعلان بشكل كلش صغير وماكو ناس اصلاً تصفح بالماسنجر حتى تشوف اعلاناتنا

اما بالنسبة للـ Audience Network ايضاً يفضل نبتعد عنه لأن هنا المقصود هو راح يظهر بالاعلانات والتطبيقات المشتركة وية فيسبوك على سبيل المثال الالعاب اللي من تخسر يطلب من عندنا نشوف إعلان حتى نكمل اللعبة

بعدها ننتقل الى الواجهة الاخيرة اللي هي واجهة الاعلان واكيد اول شي نسويه نسمي الاعلان مالتنا بعدها راح نشوف اعلان شراكة هذا نبقي مطفي وهذا يستخدم اذا نريد نسوي تعاونات وية حسابات ثانية ننتقل الى اعداد الاعلان وهنا اكو نوعين من الاعلانات الاول هو انشاء اعلان والثاني استخدام منشور حالي استخدام منشور حالي يعني راح نروج واحد من المنشورات اللي احنا ناشريها

اما اذا اختارينا انشاء اعلان ويسمى ايضاً بالـDark AD يعني هذا الاعلان ما راح يظهر بصفحتنا، فقط للجمهور المستهدف يعني اذا احد دخل لصفحتنا ماراح يشوفه. الفائدة منه ممكن نسوي عروض وخصومات بس مو لمتابعينا وانما للمستخدمين الجدد قبل لايتابعون صفحتنا، نكدر تخفيه ايضا حتى منافسينا مايشوفون اعلاناتنا، ايضًا اللي راح نختاره هو استخدام منشور حالي لان نريد نروج لمنشور موجود بالصفحة

اما إعلانات من معلنين متعددين، هذه نبقيها والمقصود هو اعلاناتنا راح تطلع مع اعلانات ثانية

الخطوة اللي بعدها هو تصميم الاعلان وهنا نحدد المنشور مالتنا سواء على الفيسبوك او الانستكرام بس نتأكد المنشور مالتنا منشور على المنصتين لان راح نواجه أخطاء في حال منشور بمنصة واحدة فقط
بعدها راح نشوف وصف المنشور وراح يتم اضافة زر “ارسال رسالة” على المنشور حتى ينبه الزبون ويزيد من عملية ارسال الرسائل على المنشور اللي تسمى CTA اللي هي Call to action يعني بالعربي الدعوة لاتخاذ إجراء يعني تحفز المشاهد يرسل رسالة ويحجز او يستفسر على المنتج

اخر شي عندنا بالاعلان هو قالب الرسالة واللي هو صراحة هواية تجار مايهتمون بيه بس احنا نشوفه مهم لان راح يختصر علينا هواية وقت واسئلة بسيطة نكدر نجاوبها اليًا

وبيه خيارين هو انشاء قالب رسالة او استخدام قالب رسالة موجود

نضغط على انشاء بعدها تعديل حتى نعدل قالب الرسالة، اول شي نسويه هو حذف كل الاسئلة المتكررة المقترحة حتى تساعدنا بالاجابة على الاسئلة المتكررة مثل السعر او التوصيل

ومهم كلش نمسحها لان الناس راح تظل تضغط على هذه الاسئلة المتكررة بدون فائدة النا

اللي نسويه هو نعدل على الرسالة الترحيبية مثلا:
نرحب بالزبون بالصفحة او المتجر بعدها نكول للزبون اذا يريد يثبت طلب على اسم الجهاز اللي ناشريه
ونحفزه يكتب معلوماته وعنوانه حتى يوصل المنتج بأسرع وقت وسعر المنتج هو 20 ألف مثلا والتوصيل مجاني او متوفر لجميع المحافظات واخر شي نكتب CTA مثلاً سارع بالحجز الكمية محدودة