الحملة الإعلانية التجريبية هي نوع من الإعلانات يُستخدم لاختبار فعالية فكرة جديدة أو إستراتيجية تسويقية قبل اعتمادها وتطبيقها على نطاق واسع. تهدف الحملة إلى جمع بيانات وقياس تأثير الإعلانات على مجموعة صغيرة من الجمهور المستهدف، وتحليل النتائج لمعرفة مدى جاذبية الفكرة وجدواها التجارية.

عادةً ما تُستخدم الحملات التجريبية لاختبار أنواع مختلفة من المحتوى، وتصاميم الإعلانات، وفئات الجمهور، أو قنوات التسويق، وتساعد على تحسين الرسائل الإعلانية وتقليل المخاطر المالية وإذا كان المنتج اللي نريد نروج عليه رابح أم لا.

لذلك تجارنا المحترفين دائما يسوون حملات تجريبية بميزانية قليلة لمدة على اكثر من منتج حتى يعرف إذا كان هذا المنتج رابح او لا وبهدف التأكد من نجاح المنتج، ونكدر نتأكد من هذا الشي عن طريق  كم طلب اجانا على هذا المنتج، عدد الأشخاص تفاعلوا وية الحملة شنو الآراء بخصوص هذا المنتج واكيد شكد حققلك أرباح على أساس هذه العوامل تحدد هل المنتج رابح وتستمر بيه ام لا.

زين شلون نسوي الحملة الإعلانية التجريبية؟ نكدر نعرف شلون نسوي حملة اعلانية تجريبية من خلال اتباع الخطوات المذكورة في هذه المقالة واللي توضحلنا طريقة انشاء حملة اعلانية على مدير إعلانات ميتا خطوة بخطوة، كل اللي عليكم تجارنا هو اتباع الخطوات المذكورة لكن نخلي مدة الحملة 3 ايام تقريبا وبميزانية 5-10 دولار في اليوم الواحد وعلى أساس نتائج هذه الحملة راح نقرر اذا نسوي حملة اعلانية اكبر لنفس المنتج او لا.

تحليل الحملة الإعلانية: اكو عدة عوامل لازم ننتبه الها حتى نحلل الحملة الاعلانية اول شي نشوف الوصول مالتنا هل كان جيد ومعدل التكرار ايضاً كلما يزداد معدل التكرار وتفاعل ورسائل اقل معناها حملة مو ناجحة 

وبالعكس إذا كان الوصول عالي والتفاعل عالي هذا دليل على أن الناس تفاعلت على منشورك من اول مرة شافته وايضًا مهم جدًا تحسب العائد على الإنفاق اللي معروف بـ ROAS – Return on Ad Spent

زين شنو هو العائد على الإنفاق ROAS وشلون تحسبه

العائد على الإنفاق =  هو نسبة تُستخدم لقياس مدى فعالية الإعلانات في تحقيق الإيرادات. يُستخدم هذا المقياس بشكل رئيسي في الحملات الإعلانية لقياس العائد الذي يتم الحصول عليه مقابل كل وحدة نقدية يتم إنفاقها على الإعلان. (Return on Ad Spent)

 عائد على الإنفاق = (إجمالي الإيرادات من الإعلانات)/(إجمالي الإنفاق على الإعلانات)

مثال توضيحي

لنفترض أنك أنفقت 100 دولار على حملة إعلانية وجابتلك هذه الحملة إيرادات بقيمة 500 دولار.

• إجمالي الإيرادات من الإعلانات: 500 دولار
• إجمالي الإنفاق على الإعلانات: 100 دولار

لحساب العائد على الإنفاق:

عائد على الإنفاق=500/100 = 5

هذا يعني أن كل دولار أنفقته على الإعلانات جابلك 5 دولارات كايرادات.

فإذا كان العائد على النفاق يساوي واحد مثلاً معناها الحملة عوضت اللي صرفناه بس وكلما تزيد عن الواحد معناها هذه الحملة تحققلك ارباح وحتى نسهلها عليك إذا كان عائد الإنفاق أقل من واحد بهواية فمعناها هذه الحملة مو ناجحة اما اذا كان قريب على الواحد أو واحد لازم شوية ننطيها وقت اكثر ونشوف هل راح يزيد العائد على الانفاق لو راح يقل اما اذا كان العائد على الإنفاق أعلى من واحد من 1.3 وصاعد فتعتبر حملة ناجحة واكيد يبقى القرار بيد التاجر 

بما ان احنا اتفقنا ان العائد على الإنفاق لازم يكون اعلى من واحد حتى نعتبر الاعلان رابح بس قرار ان الحملة الاعلانية ناجحة يبقى بيد التاجر على سبيل المثال اني ممكن اقتنع واكون راضي اذا كان العائد على الإنفاق 1.5 اما تاجر ثاني ما راح يكون راضي إذا كان العائد على الانفاق اقل من 2 وعلى هذا الاساس التاجر اللي يقرر نجاح الحملة الاعلانية

وبهذه الحالة عرفنا الحملة ناجحة او لا واذا كانت مو ناجحة فما نستمر بيها ونعيد العملية اما بتغيير المنتج او الجمهور او المحتوى لان حتمًا المشكلة بواحد من هذه النقاط وما راح تتأكد الا تجرب عدة مرات وتلكة الحملة والمنتج الرابح

ولنفرض هسة سويت حملة تجريبية والنتائج كانت جيدة والاختبار نجح شنو الخطوة القادمة؟ اللي تسوي هنا لازم تكبر الحملات الاعلانية وحتى تعرف شلون اضغط هنا

ملاحظة أخيرة: كل المعلومات اللي ذكرناها ننصحك تجربها وايضاً تجرب اشياء مختلفة، جرب غير بالحملة الإعلانية وكل مرة حلل النتائج وشوف شنو اشتغل احسن 

بالنهاية ماكو شي واحد صحيح واكو هواي تجار يشتغلون باستراتيجيات مختلفة فمهم كلش تجرب شكد ما تكدر وتشوف شنو اللي نتائجة أفضل بالنسبة الك 

واكيد طبيعي مراح تكدر تعرف شنو المنتج الرابح أو تصنع المنتج الرابح من اول مرة، احيانا كل ثلاثة الى اربع حملات واحدة منها تكون ناجحة فقط وتكدر تكبرها ومو بس تعوض الحملات اللي ما نجحت لكن ايضاً تحقق ارباح منها.