شنو هي المصادقة الثنائية وشلون افعلها باستخدام تطبيق Duo Mobile؟
المصادقة الثنائية (2Factor Authentication) هي أحد خيارات الامان اللي صارت اغلب المنصات والمواقع توفرها وهي تعتمد على رمز التحقق اللي يرسل على رقم الهاتف او على احد تطبيقات المصادقة الثنائية عند تسجيل الدخول لحسابك. أحد أشهر التطبيقات للمصادقة الثنائية هو تطبيق Duo Mobile واللي يساعدك تربط حساباتك وتفعل خيار الامان هذا عليها.
- بعد ما تحمل التطبيق من خلال سوق Play أو App Store بمجرد دخولك على التطبيق راح تفتح الك واجهة ترحيبية، اضغط على الاستمرار Continue
- راح تظهرلك صفحة لاضافة حسابك على التطبيق باستخدام الرمز التعريفي QR code (ثم تصوير الرمز اللي يظهرلك) أو باستخدام رمز تفعيلي يوصل لحسابك، اضغط على الخيار الثاني Use activation code
- هنا راح تظهرلك قائمة بالتطبيقات اللي ممكن تستخدم دو موبايل للدخول عليها بطريقة المصادقة الثنائية، اختار التطبيق المطلوب ربطه من هذه القائمة (الانستكرام مثلا)
4. راح يطلب منك التطبيق فتح الانستكرام واحضار رمز التفعيل من اعدادات حسابك، افتح اعدادات الحساب من الانستكرام واضغط على الاعدادات والخصوصية Settings and privacy ثم على مركز الحسابات Accounts Center ثم كلمة المرور والامان Password and security وبعدها المصادقة الثنائية Two-factor authentication
5. راح تظهرلك قائمة حساباتك على الانستكرام اختار منها الحساب اللي تريده ثم تطبيق المصادقة الثنائية Authentication App من القائمة اللي بعدها وراح ينطيك الانستكرام الرمز التفعيلي اللي تحتاجه (وايضا امكانية عرض الرمز التعريفي QR code وتصويره مباشرة مثل ما ذكرنا في الخطوة الثانية)، انسخ الرمز التفعيلي الظاهر على الشاشة بالضغط على Copy key
6. ارجع الى تطبيق دو موبايل واضغط على Use activation code والصق الرمز التفعيلي اللي حصلته من الانستكرام في الخطوة السابقة هنا، راح يطلب منك تخلي اسم لهذا الحساب (تكدر تختار اي اسم تحب مثلا store)
7. بعدها راح يظهرلك رمز من 6 ارقام على تطبيق دو موبايل تكدر تسويله نسخ copy وترجع لتطبيق الانستكرام وتضغط التالي next وتدخل هذا الرمز المكون من 6 ارقام وراح تظهرلك رسالة انه تم تفعيل المصادقة الثنائية.
بهذه الطريقة تكون أمنت حسابك على الانستكرام، لان أي شخص راح يحاول يدخل على حسابك راح يحتاج هذا الرمز المكون من 6 ارقام واللي يجيك على تطبيق دو موبايل ويتغير دائما كل 30 ثانية لذلك لا يمكن تخمينه. وبنفس هذه الطريقة تكدر تربط اي حساب عندك على أي منصة تستخدمها للترويج لمنتجاتك على تطبيق دو موبايل حتى تحمي حسابك ومعلوماتك بأفضل صورة.
