تبليغ الزبائن بحالة طلباتهم ضروري تاجرنا حتى نبني ثقة ونحافظ على رضاهم بالمتجر. من يسمعون تأكيد طلبهم وإنه قيد المعالجة أو قيد التوصيل، راح يطمئنون ويحسون انه هذا المتجر اللي طلبوا منه مضمون.

التواصل الدائم بهذا الشكل يقلل قلقهم وما يخليهم يتصلون هواية ويسألون عن الطلب، ويساعدهم يحددون شوكت ممكن يوصل. لما تبقي الزبون على اطلاع تاجرنا، راح تقوي علاقتك بيه وتزيد فرصة انه يرجع يشتري من عندك مرة ثانية.

زين شلون اعرف حالة الطلب اني؟ تكدر تطلع على حالة الطلب اللي ثبتته اول باول داخل التطبيق من واجهة الطلبات لذلك تاجرنا ضروري تعرف حالات الطلب اللي تظهر على التطبيق ومعنى كل حالة من هذه الحالات من خلال الاطلاع على هذه المقالة في دليل التاجر من فدشي.

بعد ما تتابع حالة الطلب داخل التطبيق تاجرنا تكدر تبلغ الزبون بهذه الحالة أول بأول من خلال التواصل معه بنفس المحادثة اللي ثبت بيها الطلب وبطريقة جذابة وتحسس الزبون باحترافية المتجر على سبيل المثال: مرحبا زبوننا العزيز، الطلب اللي ثبتته يوم أمس لمنتج (تيبل لامب ساق طويل) صار قيد التوصيل وراح يوصلك خلال يوم الى يومين (إذا كان الطلب داخل بغداد مثلًا).

ونفس الشئ لما يكون الطلب قيد المعالجة ممكن تبلغ الزبون بتجهيز الطلب وانه راح يكون في مرحلة التوصيل باقرب وقت او في حال كانت محاولة التسليم فاشلة للطلب ممكن تتواصل مع الزبون وتتاكد من السبب واذا كان يرغب باستلام الطلب مرة اخرى او لا.