شنو هي واجهة تثبيت الطلبات وشلون نستخدمها؟
واجهة تثبيت الطلبات هي خاصية راح تمكنكم من تثبيت أكثر من طلب بوقت واحد، يعني راح تختصر عملية تثبيت الطلبات واحد تلو الاخر وراح تكدرون تثبتون الى حد 50 طلب بنفس الوقت.
تعالوا نعرف شلون نستخدم هذه الخاصية:
حتى نستخدم واجهة تثبيت الطلبات ندخل على الموقع التالي: resellers.fedshi.com
راح يطلب من عندنا الدخول برقم التيلفون اللي مسجلين بيه بتطبيق فدشي، بعدها راح يرسل النا رمز التحقق على الواتساب او على رسائل الـ SMS اذا كان رقمنا مابيه واتساب وبعد ما نخلي رمز التحقق راح تظهرلنا واجهة تثبيت الطلبات.
وراح نشوف مكان مكتوب بيه (اضغط لرفع فايل الاكسل هنا) او (اسحب الفايل واسقطه هنا في المربع) وهنا احنا لازم نحمل فايل الاكسل المخصص لرفع الطلبات حتى نكتب بيه معلومات طلباتنا وبعدها نرفعه بالمربع، ونكدر نحمل الفايل عن طريق الضغط على كلمة هنا اسفل المربع.
بعد ما حملنا الفايل نفتحه ونملأ الحقول المطلوبة بالجدول اللي هي:
- رمز النوع1: والمقصود هنا الرمز الخاص بالمنتج، تكدر تشوف رموز المنتجات هنا
- الكمية: وتعني عدد القطع اللي طلبها الزبون من هذا المنتج
- سعر الزبون: وهنا نخلي السعر المحدد للزبون
- رمز النوع2: في حال الزبون طلب منتج ثاني نكتب الرمز الخاص بهذا المنتج هنا
- الكمية: وتعني عدد القطع اللي طلبها الزبون من المنتج الثاني
- سعر الزبون: وهنا نخلي السعر المحدد الزبون للمنتج الثاني
- اضافة رمز خصم 1: نكدر هنا نضيف رمز خصم في حال توفر عندنا
- اضافة رمز خصم 2: نكدر هنا نضيف رمز خصم ثاني في حال توفر عندنا
- تطبيق العرض على سعر الزبون: في حال المنتج عليه تخفيض نكدر نمرر هذا التخفيض على سعر الزبون عن طريق الضغط على (نعم) أو نبقي هذا التخفيض على سعر الجملة ونزيد من ارباحنا من خلال الضغط على (كلا)
- تطبيق رمز الخصم على سعر الزبون: وهنا نكدر نطبق رمز الخصم على سعر الزبون
- ادفع كلفة التوصيل من ربحك: وهذه النقطة مشابهة لخاصية السلايدر وتمكنكم تسوون التوصيل مجاني وتدفعون كلفة التوصيل من ارباحكم لكن لازم يكون سعر الطلب أعلى من الحد الادنى (اي ارباح اضافية فوق الحد الادنى تكدرون تستخدموها بخصم كلفة التوصيل) على سبيل المثال
اذا كان سعر الزبون = الحد الأدنى [لا يمكن خصم كلفة التوصيل]
اذا كان سعر الزبون = الحد الأدنى + 2,000 [يمكن خصم كلفة التوصيل بقيمة 2,000 دينار]
اذا كان سعر الزبون = الحد الأدنى + 5,000 [يمكن خصم كلفة التوصيل بقيمة 5,000 دينار] - ملاحظات الشحن للمندوب (اختياري): هذا الحقل اختياري في حال عندكم اي ملاحظات للمندوب.
بعدها نخلي معلومات الزبون، ومن ضمنها اسمه ورقم التيلفون الخاص بيه وفي حال عندنا رقم تيلفون ثاني نضيفه ايضًا.
ونختار عنوان الزبون بتحديد المحافظة والمنطقة ونكتب اقرب نقطة دالة لعنوانه واخر شي نكتب اي ملاحظة إذا عندنا لفريق فدشي.
بعدها نحفظ الملف ونرفعه عن طريق الضغط على مربع الرفع وراح تظهرلنا واجهة بيها كل الطلبات اللي احنا ثبتناها بملف الاكسل.
واذا كان اكو اي خطأ راح يظهرلنا تنبيه بوجود اخطاء بالفايل المرفق ونكدر نضغط على اظهار الاخطاء وراح تظهرلنا نافذة تبلغنا بتصحيح الأخطاء اللي موجودة.
بعض الاخطاء نكدر نصححها من هذه الواجهة اللي هي: المدينة والمنطقة وتطبيق رمز الخصم على سعر الزبون وتطبيق العرض على سعر الزبون واخيرًا دفع كلفة التوصيل من ربحك.
اما الاخطاء الثانية نحتاج نعدلها بفايل الاكسل ونحفظ الفايل بعد التعديل ونرفع الملف مرة ثانية عن طريق خيار “رفع من جديد” بعدها راح تظهرلنا تم اضافة عدد الطلبات الموجودة بالملف ويبقى كل اللي علينا ان نضغط تثبيت وراح تظهرلنا واجهة مكتوب بيها تم تثبيت الطلبات بنجاح.
وبهذه الطريقة راح نكدر نثبت الى حد 50 طلب بوقت واحد وهذه العملية راح تساعدنا حتى نسرع من شغلنا ونكدر من خلالها نختصر الوقت والجهد بتثبيت الطلبات.
