شلون نسوي شعار خاص بمتجرنا الالكتروني؟
الشعار هو عنصر مرئي، ممكن يكون رمز أو صورة أو كتابة يستعمل للدلالة على علامة تجارية. للشعار استعمالات أخرى لكن راح نغطي استعماله تجاريًا حصرًا بالأسطر التالية، يرتبط الشعار بعلامتنا التجارية (متجرنا الالكتروني) بصورة وطيدة، ضروري يعكس الشعار طبيعة عملنا، نوع المنتجات اللي نبيعها، هدف ومبادئ المتجر.
شعارنا لازم يكون:
- بسيط؛ وواضح من أول نظرة
- يعكس طبيعة عمل المتجر
- مميز ومختلف عن باقي المتاجر
- قابل للاستخدام لفترة طويلة
- متعدد الاستخدامات
شنو أنواع الشعارات؟
- شعار الاسم المختصر: يتكون من الأحرف الأولى للمتجر، يتراوح بين 2-4 أحرف
- الشعار النصي: يتكون من أسم المتجر، عبارة عن مخطوطة مخصصة للعلامة التجارية
- الشعار الايقوني: عبارة عن رمز بسيط للمتجر
- الشعار الكرتوني: شخصية مرسومة تميز المتجر
- شعار رمزي: قريب من الشعار الايقوني، لكن يحتوي على تفاصيل أكثر
- الشعار المركب: عبارة عن شعار رمزي ونصي بنفس الوقت
شلون نسوي شعار خاص بينا؟
أكيد أحسن طريقة نسوي بيها شعار باستخدام برامج احترافية مثل الفوتوشوب، لكن اذا أحد ما عنده البرنامج أو الخبرة الكافية حتى يشتغل بيه، من الممكن نستعمل برامج أبسط مثل Canva. يقدم تطبيق Canva عدد كبير من القوالب الجاهزة، ممكن نستعمل واحد من عندهن ونخصصه لكن يفضل تجنب القوالب الجاهزة حتى يكون شعارنا مميز أكثر.
حتى نسوي شعار خاص بينا، أول شي لازم نحدد اسم المتجر، طبيعة عملنا ونوع المنتجات اللي نريد نبيعها، ومنو جمهورنا. بعدها نفتح مشروع جديد بـCanva ونستعمل الاشكال الرسوم الموجودة والنصوص حتى نرسم الشعار. نجمع كل العناصر اللي راح نستعملها بمكان واحد بعدين نبدي نخصصها.
مثالنا الحالي عن متجر اسمه “الشحنة”، متخصص ببيع الأجهزة الالكترونية، جمهوره الشباب بين 18-35 سنة. بالتالي الشعار راح يكون رمز لشحنة كهربائية، والألوان فاتحة حتى يكون جذاب أكثر للفئة العمرية المستهدفة. على هذا الأساس نرتب العناصر بشكلها النهائي ونغير احجامها وألوانها باللي يناسبها.
بعد ما نخلص تصميم الشعار، نكدر نستخرجه ونستعمله كصورة لصفحاتنا على مواقع التواصل الاجتماعي، بمشوراتنا وأي نشاطات أخرى نسويها.
